Ким биринчи: Элдорми ёки Виталий?

Виталий Денисов 2005 йилги УЕФА кубогида ЦСКА делегацияси таркибига кирган, лекин учрашув қайдномасидан четда қолганди. Шунга қарамай, у ўз медалини қўлга киритган.

***

«Рома» Конференциялар лигасида ғолиб чиққач, еврокубокни қўлга киритган даст-лабки ўзбекистонлик футболчини аниқлаш масаласида баҳсли вазият вужудга келди. 

Биринчи вариант - Виталий Денисов. У УЕФА кубоги-2005 финалида ЦСКА «заявка»сида бўлган, ҳаттоки, Лиссабонга йўл олган жамоа таркибида финалга тайёрланган. Виталия ўшанда ўйнамади, лекин медалини олди.

Иккинчи вариант - Элдор Шомуродов. «Рома» таркибида тўп суриб, Конференциялар лигаси-2022да гол ҳам урди, финалда бир неча дақиқа ўйнади.

Энди ушбу жараёнга «Сўғдиёна»нинг ҳозирги бош мураббийи Улуғбек Бақоев ҳам қўшилди. У 2007 йили Костанайнинг «Тобол» клуби сафида Интертото кубогида зафар қучган. Ўша мавсум Бақоев майдонга ҳам тушган, гол ҳам урган, демакки, клубнинг муваффақиятида унинг улуши етарли.

Бошқа томондан, Интертото кубоги классик еврокубок ҳисобланмайди. Биринчидан, турнирда ҳеч қачон ягона финал ўтказилмаган, шу сабабли, ҳар мавсум ғолиблар ҳам алмашаверган. 2007 йили 11та клуб шундай мақомга эришган. Мисол учун, «Гамбург», «Атлетико» ва «Блэкберн». Ўша йилнинг бош ғолиби «Гамбург» саналади, жамоа УЕФА кубогида бошқалардан узоқроққа борган, бу турнир эса Интертото кубоги саралашининг бир қисми саналади. Ушбу факт ҳам (турнир ичидаги турнир) Интертото кубогининг тўлақонли еврокубок ҳисобланмаслигига иккинчи сабабдир.